Михаил Филиппович Харкин

Михаил Филиппович Харкин (22.11.1883, Жайық казак-орыс әскері, Круглый кенті - 19.09.1952, Гурьев облысы, Бақсай ауданы, Яманка кенті) – Махамбет ауданына еңбегі сіңген ұстаз.

17 жасында болашақ педагогтің әкесі Филип Абрамович ұлын Орал діни семинариясына оқуға жібереді. 1902 жылы оқуын аяқтаған соң, Михаил Филиппович Жайық казак әскерінің Круглый кентіне ауыл мұғалімі болып жұмыс жасауға жіберіледі. 1904 жылы ол Гагаева Анна Ивановнамен отау құрып, бірге 11 баласын өсіріп жеткізеді.

7 жыл халық мұғалімі болып табысты жұмыс жасап, Жайық казактарына білім беруде үлкен жетістіктерге жеткен соң, 1909 жылы балаларға білім беру үшін қалмақ даласына мұғалім болуға жұмысқа жіберіледі.

1912 жылы Жайық даласына оралып, ұстаздық қызметін Жайық казак әскерінің Гурьев бөліміне қарасты Бақсай кентінде 1921 жылға дейін жалғастырады. Сол жылы ол Яманка кентіндегі мектептің меңгерушісі лауазымына тағайындалады.

1937-1938 жылдары Редут кентінде жұмыс істейді. Ол сонда 5 және 6 сыныптарды құрып, алғаш рет орталау білім беретін мектеп ұйымдастырады.

Халық ағарту ісіндегі қажырлы әрі жемісті еңбегі үшін Михаил Филиппович «Еңбек Қызыл Ту» орденімен марапатталды. Бұдан бөлек, оған «Қазақстанның 15 жылдығы» белгісі берілді.

1942 жылы оны Гурьев облысы, Сарайшық кентіндегі орта мектеп-интернаттың директоры қылып тағайындайды. Онда 1943 жылға дейін табысты басқарады. Ауыр сырқат ұстаздың педагогикалық мансабын уақытша үзеді. Сауыққан соң өз қалауы бойынша Яманхалинка орта мектебіне жіберіліп, 1952 жылға дейін мұғалім болып қызмет атқарады.

1952 жылы 19 қыркүйекте 68 жасында ауыр сырқаттан Михаил Харкин көз жұмды.

Халық педагогтің еңбегін жоғары бағалады. Ол республикалық маңыздағы дербес зейнеткер болды. 1998 жылы Махамбет ауылына оның атына көше берілген.