Муниципалитет

Муниципалитет (неміс тілінде Munіzіpalіtät, өзін-өзі басқару құқығы бар қала) – Батыс Еуропа мен Американың кейбір елдеріндегі өзін-өзі басқарудың сайланбалы органы.

• Муниципалитет мэр, бургомистр, тағы басқа басқаратын сайланбалы алқа мен шенеуніктік атқарушы аппараттан құралады. Муниципалитет өзі басқаратын аумақтағы қоғамдық кәсіпорындардың, тұрғын үй қоры мен басқа да дүние-мүліктің меншік иесі бола отырып, мемлекеттік мектептердің, жергілікті полицияның, медициналық, әлеуметтік қамсыздандыру мекемелерінің жұмысын басқарады.
• Муниципалитеттің негізгі кіріс көзі – халықтан жиналатын жергілікті салықтар. Қаржымен қамтамасыз етілуі жағынан орталық үкіметке тікелей тәуелді болғанына қарамастан, муниципалитеттер – демократиялық маңызды институттардың бірі. Муниципалитетке халықтың әртүрлі әлеуметтік топтарының өкілдері сайланады және олар тұрғындармен тікелей жұмыс жасайды.

Муниципалитет, муниципия —

1) бірқатар елдердегі (мыс., Бразилиядағы муниципия және т.б.) төменгі әкімшілік- аумақтық бірлік;

2) АҚШ пен Батыс Еуропаның кейбір елдеріндегі жергілікті өзін- өзі басқаратын орган.

Кейбір мемлекеттерде муниципалитет қалалардың болуы мен санына қарамастан белгілі бір деңгейдегі (әдетте 2 немесе 3) Бірыңғай әкімшілік бірлік болып табылады. Осы мемлекеттердің көпшілігінде муниципалитет сайланған органдар басқаратын ең кіші әкімшілік бірлік болып табылады. Бұл жағдайда муниципалитет ұғымы қауым, коммуна және болыс ұғымдарының синонимі болып табылады және орыс тілінде, егер түпнұсқа тілде ұқсас сөз қолданылса ғана қолданылады.