Мүйіз алдамышы

Мүйіз алдамышы - амфиболдар тобына жататын минерал. Химиялық құрамы: Ca2Na [Mg, Fe]4 [Al, Fe] [(Sі, Al)4O11]2 [OH, F]2. Құрамында темір аз Мүйіз алдамышы паргасит деп, ал керісінше темір және натрийге бай түрлері гастингсит деп аталады. Минералдардың күңгірт жасыл түрлестерін кәдімгі Мүйіз алдамышы деп, ал қара түсті минерал базальтты Мүйіз алдамышы, авгит арқылы дамыған талшықты Мүйіз алдамышы уралит деп аталады. Моноклинді сингонияда кристалданады. Мүйіз алдамышының кристалдары призмалы, бағана тәрізді болып келеді, талшықты агрегаттар түзеді. Магмалық, метаморфты жолмен пайда болады. Түсі қоңыр, күңгірт жасыл, жасыл қара, қара; жылтырлығы шыныдай; қаттылығы 5 – 6, тығыздығы 3,1 – 3,3 г/см3. Кәдімгі Мүйіз алдамышы интрузиялы (гранодиориттер, сиениттер, диориттер, мүйіз алдамышты габброларға), эффузиялы (андезиттер, базальттар, порфириттерге), сонымен қатар метаморфты тау жыныстарына (амфиболиттер, мүйіз алдамышты гнейстерге) тән. Мүйіз алдамышы – салыстырмалы түрде тұрақты минерал, бірақ гидротермальды ерітінділер әсерінен хлоритке, эпидотқа, кальцитке, кварцқа айналады. Желдену процесінде опал, карбонат, тағы басқа минералдар түзе отырып ыдырайды. Құрылыс материалы ретінде, көркемдеу ісінде қолданылады.