Наймантөбе

Наймантөбе - ежелгі қоныс орны. Түлкібас ауданы бұрынғы Корниловка ауылының шетінде, Арыс өзенінің сол жағалауында. 1940 жылы Жамбыл археологиялық пунктінің экспедиция (жетекшісі Г.И.Пацевич) тапқан. 1966 жылы Шымкент педагогикалық институтының археологиялық отряды (жетекшісі Н.П.Подушкин) зерттеген. Қоныс "алаңқайлы төбе" түріндегі ескерткіш болып табылады. Орталық төбенің табаны 100x90 м, биіктігі 9 м. оған оңтүстік-шығыс жақтан таға тәрізді келген алаңкайлы-төбешік жалғасады. Оның ауданы 30x50 м, биіктігі 5 м. төбенің солтүстік беткейінен аумағы 5x2 м тік қазба (шурф) түсірілген. Ол 2 м терендікке дейін жеткізілген. Қазба барысында үй қабырғаларының орны, қыш ыдыстар сынықтары, үй және түз аңдарының сүйектері аршылып алынған. Құмыралар (хум, құмыра, саптаяқ, қақпақ, т.б.) түрлері ас үйлік, ангобпен әшекейленген. Кейбіреулеріне тік, ирек сызықтар түсірілген. Табылған заттарға қарағанда, қонысты халық 8—10 ғасырларда мекен етіп, Арыс өзенінің төменгі ағысындағы елді мекенмен мәдени-экономикалық байланыстар орнатқан.