Никифор Акимович Ахременко

Никифор Акимович Ахременко (1914, Солтүстік Қазақстан облысы Қызылжар ауданы Новоникольский с. - 12.1.1944, Украина, Кировоград облысы Новомиргород ауданы Пенькино с.) — екінші дүниежүзілік соғысқа қатысушы, кіші сержант. Украин. 1935 ж. Петропавл қаласына қоныс аударып, локомотив депосында паровоз тазалаушы болып жұмыс істеді. Кеңес әскері қатарына 1942 ж. 31 желтоқсанда шақырылып, Ұлы Отан соғысына 116-Харьков атқыштар дивизиясы 441-атқыштар полкі құрамында қатысты. 1944 жылдың каңтар айының басында армия генералы. И.С.Көневтің басқаруымен 2-Украина майданының әскерлері Кировоград операциясын өткізді. Осы операция барысында болған ұрыстардың бірінде, яғни 1944 жылдың 12 қаңтарына қараған түні 1-атқыштар ротасы Каниж деревнясының кіре берісіндегі биіктікке орналасқан дұшпан траншеясын басып алып, жауды қашуға мәжбүр етті. Бірақ жау өз позициясын қайтарып алу үшін бірнеше рет қарсы шабуылға шықты. Дұшпанның 7-қарсы шабуылында қасындағы жолдастарын жаншып, таптап өткен танкіге қарсы Ахременко көтерілді. Денесіне танкіге қарсы лақтырылатын гранаталарды байлап алып, шынжыр табанның астына құлады. Танк жарылып, жаудың соңғы шабуылы тойтарылды. Ахременкоға КСРО Жоғары Кеңесі Төралқасының Жарлығымен Кеңес Одағының Батыры атағы берілді (17.5.1944). Алматы, Петропавл қалаларының бір көшесіне Ахременконың есімі берілген. Ленин орденімен, бірнеше медальдармен марапатталған.