Никифор Михайлович Ирченко

Никифор Михайлович Ирченко (1884, Мәскеу губерниясында - 1920) - Атбасар уезінде Азамат соғысына белсене қатысушы.

Революциялық қозғалысқа қатысқаны үшін әкесі 1889 жылы Атбасар уезінің Мариновка селосына жер аударылды. Ирченко 12 жасында жетім қалып, ағаш ұстасы болып жұмыс істеді. 1914 жылы майданға алынып, онда большевиктер идеясымен танысты. Майданнан қайтып келіп, саяси өмірге белсене араласты. Атбасар уездік аткомының мүшесіне сайланды. Уезде Кеңес өкіметі уақытша құлаған кезде астыртып жұмыс жүргізді. 1919 жылы тамызда колчакшыларға қарсы Мариновка шаруалары көтерілісін басқарушылардың бірі болды. Көтерілісшілер оны селолық Кеңестің және отрядтың бастығына сайлады. Отрядтардан құрылған халықтық армияның командирі болды. Мариновканы ақ гвардияшылар уақытша басып алған кезде Қызыл әскер бөлімшелеріне барып қосылды. Колчак армиясымен ұрыста қаза тапты.