Нысан мұнай-газ конденсат кен орны

Нысан мұнай-газ конденсат кен орны, Батыс Елемес — Каспий маңы ойпатының оңтүстік-шығысында, Маңғыстау облысы, Бейнеу ауданы, Боранкөл ауылынан оңтүстік-шығысқа қарай 40 км жерде орналасқан. Кен 1987 жылы ашылған.

Геологиялық құрылымы

Төменгі бор мен жоғарғы юраның мұнайлы көтерілімі ендікке жуық бағдарланған брахиантиклиналь. Жоғарғы жіне ортаңғы юра шөгінділердін өнімділігі анықталған, осылардың қатқабатындағы 9 номенклатуралық қабаттың алтауында мұнай мен газдың иірімдері бар.

Жатыс сипаты

Коллекторлары терригендік, кеуекті. Мұнайлы иірімдерде жалпы тиімді қалыңдықтар 1-35 м-ге, мұнайға қаныққан қалыңдығы 1-20,2 м-ге дейін өзгеріп отырады. Иірімдердің биіктігі 1,6- 32,5 м-ге дейін ауытқиды. Юра иірімдерінің бастапқы қабаттың қысымы 24,6-27,9 МПа, температура 83^°С-қа жетеді. Қабаттар мен блоктар бойынша мұнай шығымдары 19,2-140,9 м³/тәулікке, кейде 216 м³/тәулікке, газдікі 24-26,9 м³/тәулікке дейін өзгереді.

Мұнай құрамы

Келловей иірімінің мұнайы ауыр, тығыздығы 884 кг/м³, аз күкіртті, аз парафинді. Орта юра мұнайының тығыздығы жеңілден (845-855 кг/м³) ауырға дейін (877-907 кг/м³) ауытқиды, аз күкіртті, аз парафинді, шайырлы (6,3-12,4%). Келловей иірімінің конденсатының тығыздығы 740- 760 кг/м³, ондағы күкірт мөлшері 0,15%, 0,1-0,7% асфальтты шайырлы заттар, парафині аз. 7 мм штуцерде шығымы 44 м³/тәулік, газдағы мөлшері 10 м³/м³. Мұнайда еріген газ құрамында 55-85% метан, 5,4-14% этан, 1,9-7% пропан, 1,3-5,2% бутан, 2,6%-ға дейін метанның жоғары гомологтары болады.

Газ құрамы

Газ құрамында азот (1,75%), болмашы мөлшерде көмір қышқыл газы] бар. Бір қабаттағы еркін газда 81% метан, 9% ауыр көмірсутектері, басқа бір қабатта метанның мөлшері 45,97%, ал ауыр көмірсутектерге 50%-ға дейін үлес тиеді. Қабат сулары хлор-кальций типті тұздық. Иірімдердің режимі мұнайда еріген газдың білінуімен серпімді суарынды. Кен пайдалануға 1996 жылы берілген.