Нұрсейіт Әлімбайұлы Ибрагимов

Нұрсейіт Әлімбайұлы Ибрагимов (20 наурыз, 1937 жыл, Оңтүстік Қазақстан облысы, Сайрам ауданы – 8 қаңтар, 2021 жыл, 84 жас, Шымкент қаласы) – ҚР Суретшілер Одағының мүшесі, өнер қайраткері, елімізге және шетелдерге танымал талай суретшілерді тәрбиелеп шығарған суретші ұстаз.

Нұрсейіт Ибрагимов
Нұрсейіт Ибрагимов
Туған күні	20 наурыз 1937 (1937-03-20)
Туған жері	Сайрам ауданы
Қайтыс болған күні	8 қаңтар 2021 (2021-01-08) (83 жас)
Қайтыс болған жері	Шымкент қаласы
Шыққан жері	Сталин атындағы колхоз
Азаматтығы	Қазақстан
Жанры	портрет

Өмірбаяны

1937 жылдың 20 наурызында Оңтүстік Қазақстан облысы Сайрам ауданының Сталин атындағы колхозында дүниеге келген. 1944 жылы мектеп табалдырығын аттаған. Суретшілк қыры жастайынан көрінген ол мектепте «Кірпі» қабырға газетінің редакторы болған. Небәрі 7 жасында, 1945 жылы Жеңіс шеруіне арнап, Сталиннің портретін салған.

1947-1956 жылдары омыртқа сүйегінің туберкулезі деген диагнозбен Сайрамдағы сүйек-туберкулез ауруханасында жатып, ауруханадан 19 жасында жазылып шыққан. Мұғалімдері ауруханаға келіп оқытып, орыс тілінен беретін ұстазы Кеңес Одағының Батыры Алексей Петрович Маресьевтің қиын тағдыры туралы баяндайтын «Нағыз адам туралы повесть» атты кітапты сыйлаған. Бұл жас Нұрсейттің өмірін өзгерткен шығарма болған.

Еңбек жолы

Аурудан жазылып шыққаннан кейін әртүрлі ұйымдарда суретші-безендіруші болып еңбек етті. «Қызыл Маяк» артелінде жұмыс істеді. Жарнамалық плакаттар сала жүріп, гипс пен саз балшықтан мүсін жасау өнерін меңгерді. Шымкент қаласындағы Клоков атындағы №10 мектептің кешкі бөлімінде оқыды.

• 1962 жылы Шымкент облыстық қазақ-орыс драма театрына жұмысқа орналасты.

• 1964 жылы Николай Васильевич Гоголь атындағы Алматы көркемсурет училищесінің көркемсурет-педагогикалық бөліміне оқуға түсіп, 1969 жылы суретші-педагог мамандығын алды.

• 1969 жылдан бастап Шымкенттегі балалар өнер мектебінде сурет пәнінің мұғалімі болып еңбек етті.

• 1974-1987 жж Әбілхан Қастеев атындағы Шымкенттегі көркемсурет училищесінде дәріс берді.

• 1984 жылдан Шымкент көркемсурет шеберханасында еңбек етті.

• 1987 жылы балалар көркемсурет мектебіне қайта оралып, зейнетке шыққанға дейін сол жерде жұмыс жасады.

Қоғамдық қызметі

Нұрсейіт Ибрагимов ішкі істер органдарының қызметкерлеріне көптеген қылмыстың ашылуына да көмектесті. Құқық қорғау органдары қылмыс жасаған күдіктінің фотороботын салу қажет болған кезде суретшінің көмегіне жүгінетін. Сол кезде суретші болжамды қылмыскерлердің фотороботын жасап, эскиздерді де салып беретін. Куәгерлердің айтуымен бала ұрлаған әйелдің фотороботын салып, соның арқасында күдіктіні полицияның тез қолға түсіргені бар. Біреудің айтуымен адамның шынайы түр-тұлғасын айнытпай қағазға түсіру – екінің бірінің қолынан келе бермейтін дара талант. Осылайша 50 жыл құқық қорғау органдарымен қоян-қолтық жұмыс істеген суретшінің шеберлігінің арқасында ізі суымай ашылған мұндай істер өте көп. Бұдан бөлек ақсақал мереке күндері гүл сатып тұрған жігітті атып кеткен қылмыстың ашылуына да өз септігін тигізді. Ол қылмыскерді табу үшін оқиға болған жерге барып, базарда тұрған куәгерлердің айтуы бойынша күдіктінің фотороботын салып берген. Бір аптадан кейін суреті салынған күдікті адам ұсталған. Нұрсейіт Ибрагимов зейнеткерлікке шыққан соң портрет салумен түбегейлі айналыса бастады. Оның бір ерекшелегі, модель әрдайым алдында отыруы шарт емес, тәжірибелі көзімен адамның ішкі әлеміндегі басты нәрсені анықтап, портретте бірнеше штрихтармен дәл бейнелей салатын. ҚР Тұңғыш Президенті – Нұрсұлтан Әбішұлы Назарбаевтың Шымкентке келген бір сапарында портретін салып, өзіне тарту еткені де бір тарих.

Марапаттары

• ҚР Суретшілер одағының «Бейнелеу өнеріне сіңірген еңбегі үшін» медалі

• «Ұлы Отан соғысындағы Жеңіске 75 жыл» мерекелік медалі

• Облысқа еңбегі сіңгені үшін медалі

• «Қазақ хан-батырлары» қоғамдық бірлестігінің «Ұлы дала патриоты» төсбелгісімен және Құрмет грамоталарымен марапатталған.

Отбасы

Жұбайы Бекжұманова Баян екеуі 1971 жылы отбасын құрды. Өмірге 1 ұл, 3 қыз тәлім-тәрбие берді. Ортаншы қызы Жәмилә әке жолын қуып, өзінің суртешілік талантын ұстаздықпен ұштастырған. Ол қазір Түркістан қаласындағы Назарбаев Зияткерлік мектебінде өнер пәнінің мұғалімі болып жұмыс жасайды.