Оралбек батыр

"Оралбек батыр" - батырлық дастан. Қызылордалық Молдағали Құлмырзаев 1938 жылы жазып жырлаған дастан, қарапайым диқаншының баласы Оралбек батырдың хан қызына ғашық болу жайынан сыр шертіп, сүйген қызына қосылу мақсатына жету жолындағы шым-шытырық оқиғаға толы ерлік істерін әңгіме қылады. Шығарма Оралбектің қапыда өлуімен қайғылы аяқталады. Дастанның 1940 жылы осы ақын жазып, толықтырылған, өз алдына тақырып-тарауларға бөлінген көлемді нұсқасында сюжеттік айырмашылық бар: мұнда Оралбек батыр Бұқар қ-на аттанып, Назым деген қызға үйленгенімен ол қыз жолда бір көлге түскенде суға батып өледі де, одан кейін батырдың қалмақ ханы Өлмесханмен соғысы сөз етіліп, оны жеңгеннен кейін хан қызын алуымен аяқталады. Екі нұсқа да қара өлең және жыр үлгісіне құрылған. Алғашқы нұсқа Орталық ғылыми кітапхана қорында, екіншісі - Әдебиет және өнер институты қолжазба және мәтінтану бөлімінде сақтаулы.