Махамбет Өтемісов атындағы Батыс Қазақстан университеті

Махамбет Өтемісов атындағы Батыс Қазақстан университеті – Батыс Қазақстан облысындағы жоғары оқу орны әрі ірі ғылыми-оқу орталығы.

Махамбет Өтемісов атындағы Батыс Қазақстан университеті
Университет атауы
Халықаралық атауы	West Kazakhstan University
Бұрынғы атауы	А.С. Пушкин атындағы Орал педагогикалық институты
Жалпы сипаттамасы
Құрылған жылы	1932
Түрі	Мемлекеттік университет
Орналасуы
Орналасқан жері	Қазақстан
Мекенжайы	Орал қаласы, Н.Назарбаев даңғылы, 162
Әкімшілік
Ректоры	Серғалиев Нұрлан Хабибуллаұлы
Негізгі көрсеткіштер
Сайты	https://wku.edu.kz/kk/

Тарихы

Алғашында Орал педагогикалық институты болып педагог кадрлар даярлайтын жоғары оқу орны болды. 1932 жылы Орынбор қаласынан көшірілген Халық ағарту институтының негізінде ашылды. 1937-ші жылдан бастап институт А. Пушкин атын алды. 1996 жылы Пушкин атындағы Батыс Қазақстан Гуманитарлық Университеті болып өзгерген. 2000 жылы Университет Орал қаласындағы Батыс Қазақстан агротехника академиясын және Мәдениет институтымен біріктіріліп Батыс Қазақстан Мемлекеттік Университет болып қайта құрылды. 2002 жылы БҚАУ құрамынан шығып, 2003 жылы Университет Махамбет Өтемісұлы атын алды.

Құрылымы

Оқу орнының құрамында 6 факультет бар:

1. Педагогикалық факультет
2. Мәдениет және өнер факультеті
3. Физика-математика факультеті
4. Жаратылыстану-география факультеті
5. Тарих, экономика және құқық факультеті
6. Филология факультеті

Университетте 20 мамандық бойынша аспирантура, екі канд. дисс. қорғау жөніндегі ғыл. кеңес бар. Сондай-ақ университеттің редакциялық-баспагерлік бөлімі дербес баспаханамен жарақтандырылған, мұнда «Вестник ЗКГУ» жинағы шығады. Университет кітапханасында 1 млн-нан астам кітап қоры жинақталған, онда электронды каталог пен жергілікті компьютерлік желі іске қосылған. Университеттің 5 оқу ғимараты, 4 жатақхана, 600 мың кітап қоры жинақталған кітапханасы бар. Мұнда зоология мұражайы, биохимия лабораториясы, жаңа ақпараттар лабораториялары жұмыс істейді. Университет кадрлар даярлаудың көп сатылы жүйесіне көшіріліп, әмбебап мамандарды даярлауға бағытталған. Университетте 2,5 мыңнан аса студенттер дәріс алады. Ағылшын, неміс және араб тілдері оқытылады. Мұнда 4 ғылым докторы, 85 ғылым кандидаты, 17 профессор және жүзден астам доцент еңбек етеді.