Оңтүстікмұнайгаз

Оңтұстікмұнайгаз - 1985-1996 жылдары Құмкөл кенорнынан мұнай өндірумен айналысқан мемлекеттік акционерлік қоғам. Меншік түрі - жеке. Оңтүстік Торғай өңірінің мұнай және газ кенорындарын игеру және барлау алғашқы кезде республиканың өз күшімен және өз қаржысымен жүргізілді. 1986-1993 жылдары Құмкөлді игеруге 6 млрд теңге қаржы жұмсалды, жабдықтарды дайындау және жөндеу мақсатында Кентаудың "Эксковатор" зауыты, Жосалының механикалық зауыты және Қызылорданың жөндеу-механикалық зауыты тартылды, "Туран-сервис" бірлескен кәсіпорны құрылды. Акционерлік қоғам құрамында 13 технологиялық және қызмет көрсету белімшелері жумыс істеді. Акционерлік қоғамды сатқанға дейін Құмкөлде 10 млн. тонна мұнай өндірілді. Оңтүстік Қазақстанның өзге кенорындарын барлауға, игеруге және олардан өнім алуға нақты келісім-шарттар негізінде "Құмкөл-Лукойл", "Қазгермунай", "Туранпетролеум", "Қуатамлонмунай" бірлескен кәсіпорындары тартылды. 1996 жылы Қазақстан Республикасының Үкіметі "Оңтүстікмұнайгаз" мемлекеттік акционерлік қоғамын Канаданың "Харрикейн Хайдрокарбондз Лтд" компаниясына сатты. Сату-алу келісіміне сәйкес, байырғы дауыстаушы акциялардың 89,5%-ы канадалық компанияның иелігіне өтті, сөйтіп ол "Оңтүстікмұнайгаздың" жеке-дара иегері мәртебесін иеленді. Акциялардың қалған 10,5%-ы акционерлік қоғам мүшелеріне таратылды. Кәсіпорынның кейінгі атауы - "Харрикейн-Құмкөл Мұнай", одан да кейінірек ол "Петро Қазақстан Құмкөл Ресорсиаз" деп аталды.