Павел Егорович Огнев

Павел Егорович Огнев(7. 12.1911, Қостанай облысы, Меңдіғара ауданы,Боровской кенті - өлген жылы белгісіз) - 2-дүниежүзілік соғысқа қатысушы, кіші лейтенант, рота командирі,орыс.1928—40 жылдары Челябі облысындағы Копейск қаласында жұмыс істеді. 1940 жылы өзінің туған Боровской кентіне келді. Огнев 1941 жылдың тамыз айында Кеңес әскері қатарына шақырылды. 1943 жылдың наурызында 232-Сумск-Киев атқыштар дивизиясына келді. Сумск түбіндегі, Курск иініндегі шайқастарға қатысып, жараланды. Госпитальда бес ай жатқаннан кейін Огнев қайта майданға аттанды. Днепр жағалауында ол ротаны басқарды. Огнев Буг, Днестр, Прут өзендерінен өту кезінде ерлігімен көзге түсті. 140 жауынгерден құралған Огневтің ротасы жаудың тылында 21 күн болып, 9 жауынгерлік операция жүргізді. Нәтижесінде жаудың 139 офицері мен әскерін тұтқынға алды, жаудың екі зеңбірегін (37 мм-лік), 6 пулеметін, 2 ауыр минометін, оқ-дәрі тиеген 12 көлігін қолға түсірді. Огнев ротасының жау тылынан маңызды мәлімет әкелді. Осы өзендер бойында көрсеткен ерлігі үшін КСРО Жоғарғы Кеңесі Төралқасының Жарлығымен Огневке Кеңес Одағының Батыры атағы берілді (13.9.1944).