Перинатология

Перинатология (грек. perі — маңында, айнала және лат. natus — туу және грек. logos — ілім) — құрсақтағы нәрестенің және жаңа туған сәбидің перинаталдық кезеңіндегі дамуы мен денсаулығын қорғау мәселелерін зерттейтін акушерлік іс пен педиатрияның саласы.

Перинатология 1973 жылы медицинаның жаңа саласы ретінде акушер-гинекологтардың 7-дүниежүзілік конгресінде қабылданған.

Перинаталдық кезең жүктіліктің 22-аптасынан басталып, нәресте өмірінің 7-күнінен кейін аяқталады.

Бұл кезеңде құрсақтағы нәрестенің қалыпты жағдайдағы салмағы - 500 граммдай болады. Перинаталдық кезеңдегі шетінеуге — ерте өлу (нәрестенің босануға дейін және босану кезіндегі өлімі) және ерте неонаталдық өлім (нәрестенің туғаннан кейін 168 сағат ішінде қайтыс болуы) жатады.
Перинаталдық өлім көрсеткіші — жүкті әйел мен жаңа туған нәрестенің денсаулығына медициналық, биологиялық және әлеуметтік факторлардың тигізетін әсерін бағалаудың айқын критерийі болып табылады. Перинаталдық шетінеу жаңа туған нәрестенің салмағына тікелей байланысты. Неғұрлым нәрестенің салмағы аз болса, соғұрлым баланың шетінеу мүмкіндігі жоғары болады.

Перинатология перинаталдық кезеңмен ғана шектелмейді. Ол эмбриология, физиология, медициналық генетика, неонтология, адамның жалпы және инфекция патологиясының өзекті мәселелерін біріктіріп, нәрестенің дамуын, бейімделу процесінің қалыптасуын, гомеостаз, әсіресе, иммундық жүйенің қалыптасу, т.б. заңдылықтарын зерттейді.
1990 жылдардан бастап акушерлік іс саласына енгізілген ультрадыбыс арқылы жүктілікті, оның уақыты мен құрсақтағы нәрестенің даму ерекшеліктерін анықтап, генетик. тұрғыдан зерттеуге қол жетті.
Жаңа технология жетістіктердің арқасында құрсақтағы нәрестеде пайда болған патологияны анықтап, оны емдеуге, тіпті операция жасауға мүмкіндік туды. Қазіргі уақытта жүктілік кезіндегі әйел организмінде ерекше функциондық-морфологиялық жүйенің (ана — бала жолдасы — құрсақтағы нәресте) пайда болуына орай, ана мен құрсақтағы нәрестенің өзара қарым-қатынасының ерекшеліктерін анықтайтын перинаталдық физиология мен патология қалыптасты.

• 
  4 апта ұрықталудан кейін
• 
  8 апта ұрықталудан кейін
• 
  18 апта ұрықталудан кейін
• 
  38 апта ұрықталудан кейін