Пернебек Бейсенов

Бейсенов Пернебек - журналист және аудармашы, суретші, 1928 жылы 15-қазанда Жамбыл облысының Жуалы ауданының «Қайрат» ұжымшарында (кейін Ленин атындағы ұжымшар) дүниеге келген.

Шыққан тегі Ұлы жүздің Дулат тайпасы Шымыр руынан.

Пернебек әкесі Бейсеннен 1932 жылы, анасынан 1933 жылы әлі жөнді ес біле қоймаған шағында жетім қалған. Балалық шағы ағасы Баймырзаның қолында өткен.

1945 жылы оқу жылын аяқтап, осы жылы университетке түседі. Екі жерде білім алған: Қазақтың С.М. Киров атындағы Мемлекеттік университетінің филология факультетінің журналистика бөлімінде оқып жүріп, Алматы сүретшілер училищесін бітірген.

1949 ж. «Абай» романы үшін Мемлекеттік сыйлық алуына байланысты «Мұхтар Әуезов «Абай»романын жазу үстінде» деген тақырыпта сурет салып (кенеп, майлы бояу), ұлы жазушыға тарту еткен. Бұл суретті кезінде жазушы жоғары бағалаған. Әуезовпенкездесіп, әңгімелескен сәттерін Бейсенов естеліктерінде тәптіштеп баяндаған.

Өзінің еңбек жолын 1950 жылы бастап, 26 жыл бойы «Социалистік Қазақстан» (казіргі «Егемен Қазақстан») газетінде көркемдеу, кеңес құрылысы, ауыл шаруашылығы, партия тұрмысы, еңбекшілер хаттары бөлімдерін басқарған.

1973 жылы Алматы облыстық кеңесінің депутаттығына сайланып, көп ұзамай облыстық «Жетісу» газетінің бас редакторлығына тағайындалды. Осы кезде облыстық партия комитетінің мүшелігіне үзбей сайланып отырған. КСРО Журналистер одағының облыстық ұжымын басқарған.

«Жетісу» газетінде 1973-1986 жылдар аралығында 13 жыл редактор қызметін атқарған.

Осы үздіксіз атқарған журналистік творчестволық қызметтері үкімет тарапынан ескеріліп, жоғары бағаланып, ол «Еңбек Қызыл Ту», «Құрмет белгісі» Ордендерімен, КСРО Жоғары Кеңес Төралқасының атынан Лениннің 100 жылдығына арналған мерейтойлық медальмен, Қазақ КСР Жоғары Кеңесі Төраоқасының Құрмет грамотасымен, бірнеше медальдармен марапатталған және «Қазақстанның еңбек сіңірген мәдениет қызметкері (1978)» атағын алған тұлға.

1950 жылдың ақпан айынан 1989 жылынан дербес зейнеткерлікке шыққанға дейінгі аралықта Пернебектің Республикалық газет-журналдарда жүздеген очерктер мен суреттер, сын материалдарды, әсем плакаттары, карикатуралары жарық көрген.

Ресей жазушысы Л.Н. Гумилевтің «Қиял патшалығын іздеу», «Көне түріктер», «Хундар» деп аталатын үш кітаптан тұратын ғылыми трактаттарын қазақшаға аударған. Сол кезде «Қазақстан», «Қайнар» баспаларынан «Еңбек өрендері», «Абзал жандар», «Ақ бидай», «Топ жарғандар» атты очерктері шыққан.

Зейнеткерлікке шыққан соң, қазіргі жастарға терең тәрбиелік мәні бар мәдени тақырыпқа жазылған «Ерсілікке еліктеме, қарағым» деген өлең «Мәдениет» журналында жарияланған.

Өз өмірінен көлемді естелік жазды. Олар: «Тағдыр тағылымдары», өлең кітабы «Көңіл күй өрнектері...»

2010 жылы 13-қарашада марқұм болған.

«Пернебек - табиғат қабілет-дарынды молынан берген қазақ» (Әбілмәжин Жумабаев)