Пневмоника

Пневмоника - ағынды пневмоавтоматика — пневмоавтоматиканың аэрогидродинамикалық құбылыстарды, яғни ағындардың өзара әрекеттесуі, ағынның ыдыс қабырғасынан үзілуі, біркелкі тәртіптелген (ламинарлық) ағынды құйындандыру (турбуленттеу), ағынды сүзгілеу (дроссельдеу), құйынды ағын тудыруға негізделген құрылғыларды (элементтерді) зерттеуге және пайдалануға арналған саласы. Пневмоникада пайдаланылатын элементтер мен құрылғылар пластмассадан жоғары дәлдікпен құю, штампылау және фотохим. өңдеу тәсілдері арқылы даярланады. Әр түрлі ағынды элементтер төменгі қысымды Пневмоникада және автоматиканың ағынды-мембраналық жүйелерінде пайдаланылады. Пневмоника құрылғыларында қоректендіру, ендіру және шығару арналарынан құрылған активті элементтермен қатар, қоректендіру арнасы жоқ пассивті элементтер пайдаланылады. Пневмоника құрылғысын қоректендіру сығылған ауа толтырылған баллон, компрессор немесе орталық қоректендіру жүйесі арқылы іске асырылады. Пневмоника құрылғылары әр түрлі логикалық функциялар орындайтын автоматты басқарудың өндірістік жүйелері мен цифрлы санауыштар, тіркеуіштер, т.б. бар жүйелерде пайдаланылады. Пневмоника элементтері негізінде автоматты жүйелерге ендірілетін сипаттамаларды, яғни ағын жылдамдығын, газдың шығыны мен қысымын, қысымдар айырымын, температура, уақыт, сызықтық мөлшер, айналу жиілігін, үдеуді, күш моментін, магниттік және эл. шамаларды өлшейтін құрылғылар жасалады. Пневмониканың элементтері реттеуіштерде, қарапайым аналогты есептеу құрылғыларында, индикаторларда, энергетикалық объектілерде, ауыл шаруашылығы техникасы мен көлікті басқару жүйелерінде қолданылады. Пневмоника құрылғылары жоғары және төменгі температурада, өрт және қопарылыс қаупі бар орындарда бір қалыпты жұмыс істей алады. Сондықтан бұл құрылғылар авиация, ракета және ғарыш техникаларында, ядролық энергетика саласында жиі қолданылады. Пневмоника элементтері медицина (мыс., қолдан қан айналысын жасау және тыныс алдыру) аппаратураларда да қолдау тапқан. Пневмоника элементтері энергияны аз шығындайды.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VII том