Победит

Победит — вольфрам монокарбиді (90%) мен кобальттан (10%) ұнтақтық металлургия әдісі бойынша алынатын қатты қорытпа. Победит қышқыл металды қатты қорытпалар, кобальт (Со) металының ішіндегі вольфрам, титан және тантал карбидтерінің (WC, TіC, TaC) қатты ерітіндісі болып есептеледі. Қатты қорытпалардың (HRA 86 — 92) тозутөзімділігі мен қызусынғыштығы (800 — 1000^оС) өте жоғары болып келеді; олар бір-, екі-, үш- карбидті болып үш топқа бөлінеді. Құрамында вольфрам карбиді бар біркарбидті қатты қорытпаларды вольфрамкобальтты (ВК тобы) Победит деп атайды және олардың белгіленуі: ВК2, ВК4, ВК6, ВК8, т.б. Мұндағы сандар кобальттың сандық мөлшерін, ал қалғаны вольфрам карбидін көрсетеді. Бұл топтағы қорытпалар өте берік болады, қорытпа құрамындағы кобальт мөлшерінің өсуі оның соққы күшіне қарсы кедергісін жоғарылатады. Сонымен қатар тозутөзімділігін төмендетеді. Қатты қорытпалар ұнтақтық металлургия әдісімен дайындалады: алдымен шикіқұрам нығыздалады, одан кейін 1500 — 1900^оС температура аралығында күйе жентектеледі. Бірінші топтың қорытпалары вольфрам карбиді, көміртек пен вольфрам ұнтақтарының қоспаларынан тұрады. Победит машинаның тозған тетіктерін бастапқы қалпына келтіру және беттерінің тозу төзімділігін арттыру немесе металл өңдеу өндірісінде тескіш, кескіш құрал-саймандар жасау үшін қолданылады.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VII том