Раушан Хатиятқызы Байсейітова

Раушан Хатиятқызы Байсейітова (1947 жылы 16 қыркүйекте Алматыда туған) — балерина. Қазақ ССРнің халық артисі (1978). Қазақ ССРнің мемлекеттік сыйлығының иегері (1981). Т.Жүргенов атындағы Қазақ ұлттық өнер академиясының профессоры.

Раушан Хатиятқызы Байсейітова
Туған күні	16 қыркүйек 1947 (1947-09-16) (76 жас)
Туған жері	Алматы
Азаматтығы	КСРО  Қазақ КСР  Қазақстан
Ұлты	Қазақ
Қызметі	балерина балет педагогы балетмистер
Марапаттары мен сыйлықтары	Құрмет ордені Қазақ ССРнің халық артисі (1978)

Толығырақ

• Раушан Хатиятқызы 1947 жылы 16 қыркүйекте Алматыда дүниеге келген. Күләш Байсейітованың тәрбиесінде болған қызы.
• 1966 жылы Мәскеудің Үлкен театры жанындағы хореография училищесін бітірген.
• 1966 жылдан Қазақ опера және балет театрына қабылданып, сахналық өмірбаянын Ғ. Жұбанованың “Хиросима” балетіндегі Юки партиясымен бастады. Табиғаты драматикалық образдарға бейім биші Мария (Б. Астафьевтің “Бақшасарай фонтанында”), Гамзатти (Л. Минкустің “Баядеркасында”), Бақыт құс (И. Стравинскийдің “Бақыт құсында”) сияқты бейнелерде өзіне ғана тән нәзік сыршылдығымен көрінді. Байсейітованың ерекше шеберлігі А. Серкебаевтың “Ақсақ құланындағы” Баршагүл, Е. Брусиловскийдің “Қозы Көрпеш—Баян сұлуындағы” Баян, С.Еркінбековтың “Мәңгілік отындағы” Ана партиялары арқылы жан-жақты байқалды. Әсіресе, психология тереңдігімен, орындалу мәнерінің ұлттық бояуымен назар аударған Ана бейнесі қазақ балеті тарихына жаңалық болып қосылды.

Марапаттары

• 1968 жылы Мәскеуде өткен бүкілодақтық балет артистері конкурсының лауреаты;
• Қазақ ССРнің Еңбегі сіңген артисі (құрметті атағы);
• 1978 жылы Қазақ КСР Жоғарғы Кеңесінің жарлығымен "Қазақ ССРнің халық артисі" құрметті атағы берілді.
• 1981 жылы С.Еркінбековтың “Мәңгілік отын” театрланған қойылымындағы Ана бейнесі үшін Қазақ ССРнің мемлекеттік сыйлығы берілді.
• 2003 жылы Қазақстан Республикасы тұңғыш президентінің мәдениет саласындағы президенттік степендиясының иегері.
• 2004 жылы Елбасының жарлығымен жоғарғы мемлекеттік марапат Құрмет орденімен марапатталды.
• 2011 жылы "Қазақстан тәуелсіздігіне 20 жыл" медалі.
• 2017 жылы ҚР тұңғыш президенті елбасының мәдениет саласындағы мемлекеттік степендиясының иегері.
• Т.Жүргенов атындағы Қазақ ұлттық өнер академиясының профессоры.

Отбасы

• жұбайы Базарғали Жаманбаев (1942 жылы туылған) ҚР халық артисі, мемлекеттік сыйлық иегері, профессор.