Руслан Сұлтанұлы Аушев

Аушев Руслан Сұлтанұлы 1954 жылы 29 қазанда қазіргі Солтүстік Қазақстан облысы Айыртау ауданында дүниеге келген. Аушев Руслан — мемлекет қайраткері, Ресей Федерациясындағы Ингуш Республикасының тұңғыш президенті (1993), Кеңес Одағының батыры (1982), генерал-лейтенант (1994). Орджоникидзе құрамындағы жалпы командалық жоғары әскери училищені (1975), Фрунзе атындағы әскери академияны (1986) бітірген. 1975—80 жылдары түрлі әскери округтерде взвод, рота командирі болды, 1980—82, 1985 жылдары Ауғанстандағы соғысқа мотоатқыштар батальонының командирі болып қатысып, ерлік көрсетті. Осы соғыста ауыр жарақат алды. 1987—92 жылдары Қиыр Шығыс әскери округінде мотоатқыштар полкінің командирі, дивизия командирінің орынбасары, армия қолбасшысының әскери дайындық жөніндегі орынбасары болды. Ал 1992 жылы Ингуш Республикасы уақытша әкімшілігі басшысының міндетін атқарушы қызметін атқарып, кейін әскери қызметтен босатылды (желтоқсан, 1992). А. Ичкерия мен Ресей арасындағы соғысты (1994—96) тоқтатуға, екі жақтың бейбіт бітімге келуіне үлкен еңбек сіңірді. 1989—92 жылдары КСРО халық депутаты болды. 1993 жылдан Ресей Федерациясы кеңесінің депутаты. 1994 жылы Ингушетия президенттігіне қайта сайланған.

Руслан Сұлтанұлы Аушев.

Сілтеме

Қазақ ұлттық энциклопедиясы