СОГЭ

СОГЭ, Сөге, Сақал (туған жылы белгісіз — 711 жылы өлген) — Түргеш қағандығының қағаны (708 — 11). Билікке әкесі Үшлік өлген соң келген. Осы жылы Қытайдың Таң патшалығының солтүстік-батыстағы тірек бекіністерін талқандады. 709 ж. Таң патшалығы Согэнің “он төрт тайпаның қағаны” әрі“Алып Білге қаған” деген атағын ресми түрде мойындауға мәжбүр болады. Сондай-ақ осы жылы Батыс Түрік қағанатының негізгі аумағына түргештердің бақылауы орнады. 711 ж. Таң патшалығымен әскери одақ құрып, Шығыс Түрік қағанатына қарсы соғыста ойсырай жеңілді және осы соғыста қазаға ұшырады.