Сансызбай Құттыбаев

Сансызбай Құттыбаев - 1947 жылы 25 мамырда Қызылорда облысы, Арал ауданының Құланды елді мекенінде туылып, 2020 жылы 17 шілдеде Алматы қаласында дүниеден озды.

Белгілі ақын, мемлекет және қоғам қайраткері, техника ғылымының кандидаты, Петербургтағы Халықаралық көлік академиясының Академигі, ҚР Ұлттық аграрлық университетінің құрметті профессоры, Қазақстан Жазушылар Одағының мүшесі, «Халықтың сүйіктісі» Ұлттық сыйлығының лауреаты, Арал ауданының құрметті азаматы.

Қазақ Мемлекеттік ауыл шаруашылық институтын бітіріп, инженер-механик, кейін Өскемен жол-құрылыс институтында оқып, инженер-экономист мамандығын да иеленді. Еңбек жолын 1970 жылы Қызылорданың Жөндеу-механикалық зауытында қатардағы технолог, конструктор қызметтен бастаған. Жас кезінен бастап-ақ цех бастығы болып ұжым басқарды, кейіннен өнімнің сапасын бақылау, техникалық бөлімдер бастығы және осы зауыттың Бас инженері қызметін атқарды.

1980 жылы жеке ұжым Жылжымалы-механикалық колоннаға, 1981 — 1985 жылдары Автокомбинат кәсіпорынына басшылық жасады. 1985 жылдан бастап Қызылорда облысының Автокөлік Бірлестігінің әуелі Бас инженері, кейін ұжым бастығы болды. Қызылорда қалалық кеңесінің Депутаты, кейін облыстық кеңеске де Депутат болып сайланды.

1990 жылы Алматы қаласына ауыстырылып, Қазақстан Республикасының Көлік министрілігі Бас Басқармасының бастығы қызметін атқарып, Коллегия мүшелігіне сайланды. Осы тұста Үкімет комиссиясының құрамына кіріп, Шығыс Қазақстан облысы, Зайсан өңіріндегі жер сілкіну апатының салдарынан орын алған зардаптарды қалпына келтіру жұмысына араласты.

1993 жылы ҚР Көлік министрілігі Мемлекеттік Холдинг болып қайта құрылғанда С.Құттыбаев Вице-Президент қызметіне тағайындалды. Осы қызметте жүріп Үрімші қаласында ұйымдастырылған Қазақстан-Қытай бірлескен кәсіпорнының Басқарма мүшелігіне сайланды.

1997 жылы ол «Жібек жолы» акционерлік қоғамының Президенті болып сайланды. Кейін Қазақстан Үкіметі Республикадағы өзіне қарасты барлық облыс, қалалардағы 69 автотранспорт кәсіпорындарын біріктіріп, Мемлекеттік автокөлік Кәсіпорнын (РГАП «Казавтотранс») құрды. Осы үлкен құрылымға 1998 жылы Бас директор болып тағайындалды.

2004 жылы Ақтөбе қаласы Әкімінің орынбасары, 2005 жылы Ақтөбе облысы Ырғыз ауданының Әкімі, 2006 жылы осы облыстың Мәртөк ауданының Әкімі болып тағайындалды. 2007 жылдан Ақтөбе облыстық басқарма бастығы болып қызмет атқарды.

Алғашқы шыға бастаған (1992ж.) шежірелердің бірі «Алты ата Әлім» кітабының авторларының бірі. Кейін оның «Бұйрат», «Ақ шағыл», «Ұшан теңіз, ұлы құм », « Қырық жол» атты төрт өлеңдер кітабы, «Ой өрімдері» атты нақыл сөздер жинағы, «Бабаларға бас ием», «Ата-анаң - асқар биігің», «Әулет әлемі», «Шаңырақ - Сексен», «Құландым - құт мекенім», «Шағалағұмыр» атты тарихи танымдық туындылары және «Тораңғы тамыр дүние» атты оның сұхбат-толғаныстары, әдеби, ғылыми мақалалары жинақталған кітабы және «Азамат әлемі» атты альбом кітап жарық көрді. 2008 жылдың аяғында Қызылорда облысы әкімдігінің ұйымдастыруымен «Мәдени мұра» бағдарламасының аясында 100 томдық «Сырдария кітапханасы» айдарымен шығармалары бір томдық болып жарыққа шықты.

Ғылыми жұмыстарына байланысты 3 монографиясы, 16 ғылыми-зерттеу мақаласы жарық көрген. Бір өнертапқыштық куәліктің авторы. Петербургтағы халықаралық ғылым академиясының «Құрмет жұлдызы» орденімен марапатталған.

«Еңбектегі ерлігі үшін» медалімен, Құрмет грамоталарымен марапатталған.