Василий Васильевич Сапожников

Сапожников Василий Васильевич (9.12.1861, Ресей, Пермь қ. — 11.8.1924, Ресей, Томск қ.) — Ресейдің ботаник-географ ғалымы, табиғат зерттеушісі, К.А. Тимирязевтің шәкірті. Мәскеу ун-тін бітірген (1884). 1893 жылдан өмірінің соңына дейін Томск ун-тінде ғыл.-пед. қызмет атқарды. Осы кезеңде Сапожников Алтай таулары мен Жетісу өлкесінің өсімдік дүниесін зерттеу үшін бірнеше рет экспед-ға (1902, 1904, 1912 — 15 ж.) шықты. 1902 ж. Хантәңірі шыңына көтеріліп, 3884 м биіктіктен жан-жағын суретке түсіріп, теодолит арқылы зерттеулер жүргізді. Жетісу (Жоңғар) Алатауын зерттеп, Балқаш к-не құятын өзендердің флорасы мен фаунасы жөнінде коллекциялар мен гербарийлер жинап, Томск ун-ті мен Ресей ғылым академиясының қорына тапсырды. 1912 ж. Жаркент, Пржевальск уездеріне экспед. ұйымдастырып, Іле, Текес өз-нің алабын зерттеді, Сарыжаз өз-нің басталар жерін анықтады. Соның нәтижесінде “Жетісу очерктері” атты ғыл.-танымдық еңбек жазған. Тянь-Шаньда 2 шың, Оңт. Алтайда мұздық Сапожников есімімен аталады. Іле Алатауын зерттеу барысында Сапожниковке Т.Рысқұловтың әкесі Рысқұл Жылқыайдаров жолбасшы болған.