Саптар Естемісов

Саптар Естемісов(1919, Жамбыл облысы,Шу ауданы,Көкқайнар ауылы - 19.9.1943, Ресей, Смоленск облысы,Пречистень ауданы,Коноплянка деревнясы) - 2-дүниежүзілік соғысқа қатысушы, сержант, пулеметшілер бөлімшесінің командирі.Мектеп бітірген соң ауылдағы комсомол ұйымын басқарды. Соғыс басталғанда алғашқылардың бірі болып майданға аттанды. Естемісовтің әскери өмірі 1942 жылы 26 маусымда басталды. Ол бірнеше ұрыстарға қатысып, өзінің үздік пулеметші екенін көрсетті. 1942 жылы 2 рет жараланып, госпитальға түсті. Ұрыстарда көрсеткен ерлігі үшін «Ерлігі үшін» медалімен марапатталды. 1943 жылы тамызда 134-атқыштар дивизиясы жау корғанысын бұзып өтіп, Смоленск облысының Пречистень ауданындағы 261,1 биіктігі маңында шабуыл ұрыстарын жүргізді. Бөлімшелер шығынға ұшырай бастады. Естемісов команданы өз қолына алып, жаудың пулемет расчетімен жекпе-жек ұрысқа кірісті. 1943 жылы 9 қыркүйекте ауданның Дольшино деревнясы түбінде болған ұрыста Естемісов ерекше көзге түсті. Осы ұрыста ол 40-қа жуық гитлершіні жойды. Естемісов 1943 жылдың 14 қыркүйегінде Коноплянка деревнясы үшін болған ұрыста жаудың тылына өтіп, Кеңес әскерлерінің ілгері басуын бөгеген жаудың станокты пулеметін танкіге қарсы қолданылатын гранатамен жойды. 19 қыркүйекте кезекті ұрыстардың бірінде Естемісов өз пулеметімен 20-ға жуық гитлершіні жойды. Жауынгерлік тапсырманы ойдағыдай орындап, батырлық пен ерлік көрсеткені үшін Естемісовке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (4.6.1944). Шy ауданының Көкқайнар атындағы мектеп батырдың есімімен аталады.