Сарытас

Сарытас – өндірістік кәсіпорын, акционерлік қоғам, бұрынғы Қаратау химия зауыты. Қаратау қаласының іргесінде орналасқан. Ұсақталған фосфорит түйіршігін (шекем тасын) шығаратын Қаратау химия зауытының құрылысы 1983 жылы басталып, 1989 жылы пайдалануға берілді. 1990 – 93 жылы зауыттанттан 1 млн. тоннадан астам фосфорит түйіршігі шығарылып, Жамбылдағы «Химпром» өндірістік бірлестігіне жіберілді. Бұл кезде зауыттта 1350 адам жұмыс істеген, оның 75%-і жергілікті кадрлер еді. Елдегі экономикалық өзгерістерге байланысты зауыт өндірісі 1993 жылдың ортасынан бастап тұрып қалды. Қаратау химия зауыты акцияландырылып, «Сарытас» Акционерлік Қоғамы болып қайта құрылды, президент болып осыған дейін кәсіпорынның бас инженері болып қызмет істеген Т.Әлтеев сайланды. 1997 жылы 3 наурызда шыққан Қазақстан Үкіметінің қаулысы бойынша өндіріс консервацияланып (ұзақ мерзімді сақтау), жаңа өнімдер шығару мүмкіндіктерін қарастыру ұйғарылды. Әр түрлі ұсыныстарды саралай келіп, Т.Әлтеев бастаған ұжым осы Талас өңіріндегі шикізаттарды – тұз бен әктасты пайдалана отырып, бұрын Қазақстанда өндірілмеген – кальцилендірілген сода шығаруды ғылыми тұрғыдан негіздеп, экономикалық тиімділігін дәлелдеп берді. Техникалық - экономикалық негізделуі мен технологиялық регламенті бекітілген бұл жоба бойынша 2005 жылдан бастап «Сарытас» акционерлік қоғамында 200 мың тонна кальцилендірілген сода өндіріледі.

Сілтеме

Тараз энциклопедиясы