Спартакиада

Спартакиада – спорттың бірнеше түрінен өтетін жарыс түрі. Тұңғыш спартакиада 1928 жылы КСРО-да өткізілген болатын. Жарыс Ежелгі Римдегі құлдар көтерілісінің (б.з.б. 73/74 – 71 жылы) көсемі Спартак құрметіне спартакиада деп аталған. Спартакиада бағдарламасындағы жарыстар жергілікті дене тәрбиесінің бастауыш ұйымдарында басталып, кейін аудандық, қалалық, республикалық көлемде өтті. Ақтық бәсеке одақтас республикалардың ең ірі қалаларында өтіп, үлкен мерекеге айналып отырды. 2-дүниежүзілік соғысқа байланысты арасы үзіліп қалған спартакиада 1956 жылдан бастап жазғы, 1962 жылдан қысқы спорт түрлерінен қайта өте бастады. 1956 – 91 жылдардың аралығында барлығы 10 жазғы спартакиада өтті. Қазақстанда 1928 жылы Петропавл қаласында Бүкілқазақстандық 1-спартакиада өз жалауын көтерді. Оған қатысушылар футбол, жеңіл атлетика, қазақша күрес, баскетбол және нысана көздеуден сынға түсті. 2001 жылы бағдарламасына спорттың 25 түрі енген Қазақстан Республикасы тәуелсіздігінің 10 жылдығына арналған 1-жазғы спартакиада өтті. 2001 жылдан бастап әрбір екі жылда бір рет мектептер мен колледждер арасында спартакиада өтіп келеді.