Спрэд

Спрэд (ағылшынның spread – айырма, үзік) – 1) сұраныс пен ұсыныс бағасы арасындағы айырма. Тиянақты табыс әкелетін бағалы қағаздар үшін өтеу мерзімі әрқилы бір сыныптағы немесе әр сыныптағы, бірақ өтеу мерзімі бірдей бағалы қағаздар бойынша табыстағы айырма. Валюталық операцияларда айырбас бағамы арасындағы айырма. Акциялар нарығы үшін – нақты акцияның жоғары және төмен бағасы арасындағы айырма. Бағалы қағаздарды орналастыру кезінде эмитент алған түсім сомасы мен инвесторлар төлеген сома (оны андеррайтер сатуды ұйымдастырғаны үшін ақы ретінде алады) арасындағы айырма; 2) фьючерстік Спрэд – фьючерстік келісімшартпен биржалық саудадағы алып-сатарлық стратегиялардың түрлі мерзімде жеткізілетін фьючерстік келісімшарттарды бір мезгілде сатып алу мен сатудан тұратын сыныбы. Түрлері: уақыттық – түрлі мерзімде жеткізілетін белгілі бір активке жасалған фьючерстік келісімшартты биржада сатып алуға және сатуға бір мезгілде мәміле жасау; тауараралық – түрлі, бірақ өзара байланысты активтерге (тауарлар, бағалы қағаздар) фьючерстік келісімшарттарды бір мезгілде сатып алу және сату; нарықаралық бір активті түрлі биржалық нарықтарда (фьючерстік биржаларда, қор биржаларында, қолма-қол сауда нарықтарында, бір мезгілде сатып алу және сату; салық – салықты төмендету мақсатымен фьючерстік келісімшарттарды бір мезгілде сатып алу және сату; опциондық – белгілі бір түрдегі (колл немесе пут) активке опциондарды бір мезгілде сатып алудан және сатудан тұратын опциондық стратегиялар сыныбы. Ол деңгейлес немесе күнтізбелік (аяқталу күні бір, бірақ орындалу бағасы түрлі); сатылас немесе қиғаш (аяқталу күні мен орындалу бағасы түрлі опциондар); пайыздық – активтер мен пассивтердің пайыз түрінде табыс әкелетін пайыздық мөлшерлемесі арасындағы айырманы пайдалану түрлеріне бөлінеді; 3) бағаның ауытқуы ауқымы.

Биржа

Сілтемелер

• ССЛ
• Спот
• Свифт