Старшын Анатолий Трифонович

Старшын Анатолий Трифонович (3.8.1947 ж. т., Украина, Одесса облысы Измаиль ауданы Приозёрное селосы) – әскери қайраткер, генерал-майор (1998). Чернигов жоғары әскери авиация училищесін (1970), Әскери-әуе академиясын (1978) бітірген. 1970 – 75 жылы Закарпатье әскери округінде ұшқыш, аға ұшқыш, звено командирі және эскадрилья командирінің орынбасары – штурман болды. 1978 – 83 жылы Кеңес әскерлерінің Германиядағы тобында басшылық қызметтерде істеді. 1983 – 93 жылы Орта Азия әскери округінде авиация полкі командирінің орынбасары және командирі, авиация құрама командирінің орынбасары, 1993 – 98 жылы ҚР Әскери-әуе күштерінде әуе атыс дайындығының бастығы және жауынгерлік дайындық бастығы, Әскери-әуе күштері қолбасшысының жауынгерлік дайындық және оқу орындары жөніндегі орынбасары, 1998 – 2003 жылы ҚР Әуе қорғанысы күштері қолбасшысының авиация жөніндегі орынбасары қызметтерін атқарды. 2003 жылы запасқа шықты. 3-дәрежелі “КСРО Қарулы Күштерінде Отанға қызмет еткені үшін” орденімен, медальдармен марапатталған.