Степан Петрович Ильин

Степан Петрович Ильин(2.8.1915, Солтүстік Қазақстан облысы, Айыртау ауданы, Айыртау ауылы – өлген жылы белгісіз) - 2-дүниежүзілік соғысқа қатысушы, аға лейтенант, десантшылар взводының командирі. 1942 жылы 4 каңтарда Ташкент облысының (Өзбекстан) Беговат ауданы әскери комиссариаты арқылы Кеңес әскері қатарына шақырылды. 1942 жылдың сәуірінен 69-атқыштар дивизиясы 99-жеке саперлер полкінің құрамында ұрыстарға қатысты. Командованиеден Сева өзеніне көпір салу жөнінде бұйрық берілді. Бөлімше командирі Ильин осы жауынгерлік тапсырманы ойдағыдай орындады. 1943 жылы қыркүйек айында Ильин бөлімшесінің алдында Сева өзеніне (Днепр өзенінің сол саласы) көпір салып, атқыштар полкінің өзеннің оң жағалауына өту міндеті тұрды. Жау салынып жатқан көпірді үздіксіз атқылап, бірнеше рет талқандады. Осы операция кезінде Ильин жараланып, госпитальда болып, 1943 жылы қазан айында өз бөлімшесіне қайта оралды. Днепр өзенінен өту жаудың қарудың барлық түрінен үздіксіз атқан оғының астында жүзеге асырылды. Ильин бөлімшесімен бірінші болып Днепрдің оң жағалауына шықты. Оқпен қалқалай отырып, оң жағалауға десантшылар взводын өткізді. Кеңес әскерін Днепрге қайта түсірмек болған жау 7 рет қарсы шабуыл жасады. Соңғы шабуылында жау танкісі әскерлерімен Кеңес әскерлерінің траншеясына жетті. Жекпе-жек ұрыс басталып, Ильин ерлік пен батылдық корсетті. Днепр өзенінен өту кезіндегі ерлігі үшін Ильинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (30.10.1943). Ленин, 1-дәрежелі Отан соғысы ордендерімен және «Ерлігі үшін» медалімен марапатталды. 1946 жылы Ильин запасқа шықты. 1960 жылы мелиоративтік техникумды бітіріп, жұмыс істеді. Ташкент қаласында тұрды.