Су бэйхай

Су Бэйхай (1917, Ганьсу провинциясы – 2000, Үрімші) – қытай тарихшысы. Шыңжаң университетінде дәріс берген. Оның еңбектері Қытайдың Батыс өңірінің тарихын, географиясын, соның ішінде қытай қазақтарының тарихын зерттеуге арналған. Қазақ тілін білген. Ең көлемді 4 томдық “Қазақтың жалпы тарихы” (2003) еңбегінде қазақ ұлтының шығу тегінен бастап қазірге дейінгі тарихы қамтылған. Сондай-ақ “Қазақ халқының мәдениет тарихы” (1989) деген еңбегінде қазақ халқының көне дәуірден қазірге дейінгі қоғамдық құрылысы, мәдениеті, әлеуметтік жағдайы айтылған. Ол “Батыс өлкенің тарихы мен географиясы”, “Ұйғыр халқының тарихы”, “Моңғолия және батысқа сапар”, “Шыңжаң тарихы”, т.б. да жүзден астам ғылыми-зерттеу еңбектерін жазған. Бұл еңбектерде Қытайдағы аз ұлттардың тарихы мен мәдениеті Қытай мемлекетінің ұлттық мүддесі тұрғысынан жазылып, кейбір деректер өз ыңғайына қарай бұрмаланған. Қытайдағы аз ұлт өкілдерін қытай ұлтының құрамдас бөлігі ретінде санау, олардың тарихын Қытай мемлекетінің тарихымен тығыз байланыстыру сияқты пиғылы да көрініс тапқан.