Тас өңдеу шеберлігі

Тас өңдеу шеберлігі, Маңғыстау түбегін мекендеген халықтың әлеуметтік жағдайымен тығыз байланыста дамып өркен жайды. Әсіресе 18 ғасырдан бастап халқы үшін еңбегі сіңген, елінің сүйіспеншілігіне бөленген белгілі адамдарға, ру басшылары мен атақты батырларға арнап күмбез тұрғызу көп жағдайда тұрмыстық жағдайы жоғары деңгейдегі бай-бақуатты адамдарға көшті. Осы кезден бастап Маңғыстаудағы дәстүрлі сәулет өнері мектебінің негізі қаланып, әйгілі халық шеберлері Жылқыбай Доралыұлы, Жары Қаражүсіп пен оның ұрпақтары Өмір, Темір, Назар, Базар; Есентемір Дүтбай, Нұрнияз Жарасұлы, Әлмен Бердіұлы, Шаншар Есенұлы және Кедей Қапаш қолынан шыққан құнды сәулет өнері ескерткіштері дүниеге келді. Маңғыстау тас өңдеу шеберлерінің өнері көршілес аймақтарда да әйгілі болған. Ертеден келе жатқан Тас өңдеу шеберлігі кеңес өкіметі жылдары ұмыт болып, құлдырады; бірақ елдің тәуелсіздік алуымен байланысты Тас өңдеу шеберлігі қайта өрбіп, бой көтерді.