Теңіздік климат, мұхиттық климат

Теңіздік климат, мұхиттық климат - атмосфераға мұхиттық кеңістіктің әсері басым жағдайда қалыптасатын климат. Мұхиттар мен ішкі үлкен теңіздердің, сондай-ақ теңіз өңірінде пайда болған ауа массаларының басым ықпалындағы материк бөліктерінің климаты. Теңіздік климат континенттік климаттан температура тербелісінің біршама аздығымен, ауасының айтарлықтай ылғалдылығымен, жазы салқын және қысы жұмсақ болуымен (қоңыржай ендіктерде), көп бұлттылығымен, қатты желімен ерекшеленеді. Теңіздік климат жағдайында ең жоғары және ең төменгі температуралардың басталу уақыты 1-2 ай кеш болады (континенттік климатты атыраптармен салыстырғанда), ал көктемі күзінен суықтау болады; қыста тұрақты қар жамылғысы түзілмейді.