Тиллиттер

Тиллиттер (ағылш. tіll – дөңбек тастық саз) – көне кезеңдердің аздап тығыздалған, кейде метаморфизмге шалынған мореналық шөгінділері. Тиллиттердің ұсақ түйірлі массасында мөлшері мен құрамы әр түрлі дөңбек тастар кездесіп, қабаттастық байқалмай, дөңбек тастардың бетінде мұздықтар салған іздер болады. Гранулометр. құрамы жағынан Тиллиттердің негізгі массасы 0,06 – 0,03 мм, кейде олардан да ұсақ заттардан тұрады. Тиллиттер жоғарғы карбон мен төменгі пермь (Африка, Үндістан, Австралия, т.б.), протерозой мен палеозой (Оңт. Африка, Солт. Америка, Гренландия, Скандинавия) шөгінділерінде кеңінен тараған. Тиллиттер климаттың суынуы салдарынан қалыптасады. Қазақстанда Қаратаудың төменгі кембрий шөгінділерінен Тиллиттер қабаттары табылған.