Тырнашөп

Тырнашөп (Seselі) – шатыршагүлділер тұқымдасына жататын екі не көп жылдық шөптесін өсімдіктер. Маңғыстаудың шөлді, сортаңды жерлерінде, тұзды көлдер жағалауларында, бұталардың арасында, таудың тастақты беткейлерінде өседі. Биіктігі 20 – 50 см. Сабағы көп, жұмыр, тықыр. Төменгі жағындағы сабақтары ұзын сағақты. Жапырақтары сабақтың түбінен өніп шығады. Жапырақтары ұзын, түзу, екі рет тілімденген. Тостағанша жапырақтарының шеті тегіс, күлтесі ақ түсті. Гүлі көп (15-тей), олар шатырша гүлшоғырына топталған (шатыршасы 6 – 9 сәулелі). Шілде айында гүлдеп, тамызда жеміс салады. Жемісінің ұзындығы 4 мм-дей, сопақша, екі бүйірі қысыңқы келеді.