Тілеубек Әбдікәрімұлы Жәмінов

Тілеубек Әбдікәрімұлы Жәмінов (20.5. 1926, Ақмола қаласы - 24.1.1985, Павлодар облысы Екібастұз қаласы) - Сәтбайдың шөбересі. Омбы облысы Азов ауданы Қызыләскер жетіжылдық мектебін бітірген. 13-14 жасында ұжымшар жұмысына араласады. Әкесі Әбдікәрім тұтқынға алынған соң бір жылдай немере қарындасы Мәриям Мағазқызымен бірге Жезқазғандағы немере ағасы Қаныш Сәтбаевты паналайды. 1946 жылы Омбы қаласындағы Бүкілодақтық есеп курсын сырттай оқып бітіріп, Омбы облысы Азов ауданы Қызыләскер ұжымшары Жаңатұрмыс ауылында есепші-бухгалтер қызметін атқарады.

Профессор Т.Кәкішевтің айтуынша, екеуі 1946-49 жылы Ақмола қаласындағы драма театрында жұмыс істеген. Жәмінов 1957 жылы ата-бабасының туған жері Баянауылға оралады да, 1958 жылы Екібастұз қаласына көшіп келіп, «Рыбохолодильник» ұжымында бас бухгалтер қызметін атқарады. Гитарада шебер ойнап, чечетка биін жақсы билеген. Оның ұл-қыздары: Габдылмұтталап, Ләззат, Ибрагим, Райхан, Фарид, Баянбек, Раушан.