Түйесүйек

Түйесүйек, сеңгір таспа (Astragalus paucijugus) – бұршақ тұқымдасы, таспа туысына жататын бұта.

Қазақстанда Жамбыл, Қызылорда, Оңтүстік Қазақстан облыстарында, Балқаш-Алакөл ойысындағы құмды жерлерде, сексеуіл арасында өседі. Биіктігі 80 – 200 см. Сүректенген сабақтары жуан, көп жылдық бұтақтарының ұзындығы 25 – 55 см, ақшыл сұр түсті, ұсақ түкті. Жапырақтарының ұзындығы 3 – 17 см, тырбиып өседі. Гүлдері шашақ гүлшоғырына топталған, тостағанша жапырақшалары қоңырау тәрізді, ал күлтелері қызыл күлгін түсті. Сәуір – мамыр айларында гүлдеп, мамыр – маусымда жеміс салады. Жемісі – бұршақ, пішіні домалақ, сыртын түк жапқан. Тұқымы жасыл боз түсті, сырты жылтыр. Түйесүйек – көктемде құнарлы мал азығы, бірақ жемістенгеннен кейін сабағы, бұтақтары қатайып кетеді, мал тек жапырағын жейді.