Тұрмамбет Төлеғожаұлы

Төлеғожаұлы Тұрмамбет (1818–1916) — Адай руының Ескелді бөлімінен шыққан халық батыры. 1856 жылдың жазында Хиуаға барған сапарында Хиуа ханының Маңғыстау елін шабуға қол аттандырғалы жатқанынан құлағдар болып, суыт елге бет алады. Жолшыбай досы Балуанияз батырға соғып, екеуі 60-қа жуық сарбаз жинап, ұрымтал тұс Қараған-Босаға жерінде күші басым жаумен ұрыс салады. Жау жеңіліп, бірақ осы ұрыста Балуанияз бастаған көп адам ерлікпен қаза табады. Төлеғожаұлы содан кейін жыл сайын Балуанияз басына зиярат етіп, дұға бағыштап өтуді дәстүрге айналдырды. Соңғы сапарында бақилыққа аттанып, Балуанияздың қасына жерленген. Басында ескерткіш бар. Төлеғожаұлының бұл соғыстағы ерлігі ақын Қалнияз Шопықұлының «Балуанияз батыр» дастанында баяндалған.