Тәшриқ тәкбірі

Тәшриқ тәкбірі. Тәшриқ (сөздікте) - еттерді бөліп, Күннің астына қою деген мағынаны білдіреді. Құрбан айтта құрбандық бөліп таратылғандықтан осылай атаған.

Құрбан айттың алдындағы күнді «Арафа күні» деп атайды. Бұл - Зулхижжәның тоғызыншы күні. Арафа күнінің таң намазының парызынан кейін, құрбан айттың төртінші күнінің намаздыгер уақытына дейінгі айтылатын тәкбірді - «Тәшриқ тәкбірі» дейді. Ол былай айтылады: «Аллаһу акбар, Аллаһу акбар, лә иләхә иллАллаһу уАллаһу акбар, Аллаһу әкбар уа лиллаһи-хамд». Мағынасы: «Аллаһ ұлық (2 рет), Аллаһтан басқа тәңір жоқ! Аллаһ ұлық (2 рет), Барлық мадақтар мен мақтаулар тек Аллаһқа тән».

Әбу Юсуп пен Имам Мұхаммед бойынша, парыз намазы міндетті адамға тәкбір айту - уәжіп. Яғни, жеке намаз оқыған адам, жолаушы, тұрғын, ауылда, қалада тұрған ер, әйелдің бәріне бірдей ортақ. Бірақ Әбу Ханифа бойынша, Тәшриқ тәкбірі уәжіп болу үшін адамның тұрғын, азат, ер кісі және бұл тәкбірдің айтылу тиіс намаздың жамағатпен оқылған парыз намаз болуы керек. Сол себепті жолаушы, тұтқын, әйел және жеке басы намаз оқыған жайға тәкбір уәжіп емес. Бірақ бұлар имаммен бірге намаз оқыса, жамағатпен бірге тәкбір айтады. Жұма мен айт намаздары оқылмайтын кіші ауылдарда Тәшриқ тәкбірі айтылмайды. Айт күндері мұсылмандардың бір-бірлерін кұттықтаулары, бір-бірлерімен қол алысып, дұға етулері мәндүп.