Төлеген Дүйсенбайұлы Адам-Юсупов

Төлеген Дүйсенбайұлы Адам-Юсупов(1937 жылы туған), көрікші, КСРО-ның құрметті металлургі (1969), Социалистік Еңбек Ері (1981).

Еңбек жолын 1959 ж. Қарағанды металлургия комбинатында бастады, 1967 жылдан домна цехында аға көрікші. №4 домна цехының жобалық қуатын мерзімінен бұрын игеру жөнінде бастама көтеріп, оның 1,5 ай ішінде толық пайдаланылуына қол жеткізді. Комбинаттың 4-домна пешін іске қосу, ретке келтіру ісіне белсене ат салысты. Адам-Юсупов басқаратын №4 пеш ұжымы металлургтардың Бүкілодақтық социалистік жарысында сан мәрте жеңіп шығып, «КСРО-ның озық домна пеші» атағына ие болды (1978-1980). Адам-Юсуповтың бригадасы 10-бесжылдықтың тапсырмасын мерзімінен бұрын орындап шығып, жоспарға қосымша 5 мың т-дан астам шойын берді. КОКП 25-съезінің, Қазақстан КП 14-съезінің делегаты. 10-11-шақырылған КСРО Жоғарғы Кенесінің депутаты. 1984-89 ж. КСРО Жоғарғы Кеңесі Ұлттар Кенесі төрағасының орынбасары. Екі рет Ленин, Еңбек Қызыл Ту ордендерімен және медальдармен марапатталған.[1]

Дереккөздер өңдеу

  1. Қарағанды. Қарағанды облысы: Энциклопедия. - Алматы: Атамұра, 2006. ІSBN 9965-34-515-5