Халықаралық қатынастарды демократизациялау

Халықаралық қатынастарды демократизациялау — бүкіл адамзат тағдырымен тығыз байланысты мәселе; оның өзектілігі мен шешімін табу қажеттігі қазіргі әлемдегі халықаралық қатынастар саласындағы қарама-қайшылықтардың ширығуында, жаңа аса қауіпті қақтығыстардың туындауында жатыр. Қазіргі батыстық демократиялық мемлекеттер тұрақты қоғамдық жүйелер болып табылады. Олардың әрқайсының қалыптасуы үш кезеңнен тұрады:

1. Бірінші — әртүрлі құрамдас бөліктердің арасында байланыстардың пайда болуы.
2. Екінші — "ойын ережелерінің" болмауы себепті ол байланыстардың қақтығысқа ұласуы.
3. Үшінші — қақтығыс барысында әртүрлі құрамдас бөліктердің арасында түсіністік пен бітімгершілік орнауы нәтижесінде "ойын ережелері" қалыптасып, әртүрлі құрамдас бөліктердің арасындағы байланыс тұрақтанып, жүйе құрылды.

Қазіргі әлем ғаламдық жүйенің екінші кезеңінде тұр. Сондықтан елдер, аудандар, өркениеттер арасындағы қақтығыстар өте жиі, аса маңызды әрі қауіпті. Халықаралық қатынастардағы қақтығыстар уақытша, ғаламдық жүйе қалыптасу үстінде тұрақтылыққа қол жетеді. Бұл қақтығыстар келіссөздер арқылы, демократиялық қағидаттарды жүзеге асыру барысында шешімін тауып, халықаралық ғаламдық жүйенің қалыптасуына септігін тигізеді.