Хромдиопсид

Хромдиопсид (грек. dі — екі және opsіd — бейне) — пироксендер тобына жататын тізбекті силикат диопсидтің хромды түрі. Химиялық формуласы диопсидке ұқсас, айырмашылығы құрамында 0,07 — 0,2%-дай хром тотығының болуында. Моноклиндік сингонияда кристалданады. Түсі изумрудты жасыл болғандықтан кейде оны “Сібір изумруды” деп те атайды. Қатт. Моос шкаласы бойынша 6,0 — 6,5, тығызд. 3,2 грамм/куб сантиметр, мөлдір, жіктілігі жетілген, әйнек сияқты жылтыр. Табиғатта ультранегізді терең түзілген кимберлит, эклогит, дунит, базальт, андезит сияқты магмалық тау жыныстарымен бірге желі типтес сілтілі диопсид-ортоклаз-вермикулит құрамды ірі кристалды пегматиттік денелерде кездеседі. Хромдиопсид зергерлік істе кеңінен көп қолданылады.