Худайдат

Худайдат, Хұдайдат, Құдайдат (шамамен 1350 — 1426) — Моғолстанның ұлысбегі. Дулат тайпасынан шыққан Болатшы әмірдің баласы. Мұхаммед Хайдар Дулаттың “Тарих-и Рашиди” шығармасы бойынша ол Моғолстанның 6 ханын таққа отырғызған. Худайдат туралы Низам әд-Дин Шами, Шараф әд-Дин Әли Йездидің шығармаларында да айтылады. Уәйіс ханның екі баласы — Есенбұға мен Жүніс хан Моғолстан билігіне таласқанда Худайдат біріншісін таққа отырғызған. Ұлықбекпен ниеттес қарым-қатынаста болып, оның 1425 ж. Жетісуға жасаған жорығында алдынан шықты. Худайдат қажылықпен Меккеге барып, Мединеде қайтыс болған. Орнына мирасқоры Мир Мұхаммед Моғолстанның ұлысбегі болды.