Шеңгел (құс уысы)

 Басқа мағыналар үшін Шеңгел (өсімдік) деген бетті қараңыз.

Шеңгел — аңшы құс аяғындағы төрт саусағының сыртқы жағындағы шынашағының атауы.

Оны кей өңірлерде ілгіш деп те атайды. Өкше жағындағы саусағын тегеурін, ішкі жағындағы саусағын жембасар, ортаңғысын сығым дейді. Құс аяғын, оның уысын да Шеңгел деп атай береді. Қолға үйренген бүркітпен түз құсын ұстаудың бір тәсілі “шеңгелдестіру“ деп аталынады. Ол үшін қолға әбден үйренген қашпайтын қол құсының балақбауына берік етіп аң терісін, ет орайды да, түз құсы көрінген кезде ұшырады. Сонда үй құсы өз тектесімен жұптасып ұшуды аңсап көтерілсе, түз құсы оның аяғындағы жемге шүйлігеді. Мұндай жағдайда екі құстың аяқтары бір-біріне оралып, арпалысқан жағдайда жерге құлайды да, қолға түседі.