Штегман

Штегман Борис Карлович (1898, Ресей, Псков қала– 28.12.1975, Ленинград) – орнитолог ғалым, биол. ғыл. докт. (1934), проф. (1933). 1925 жылы Петроград ун-тін бітірген. КСРО ғылым академиясының Зоология музейінде (1928 – 41, 1945 – 55), “Борок” биол. ст-нда (1955 – 70), Өзен-көл суының биологиясы ин-тында (1970 – 75) жұмыс істеді. 1941 – 45 жылы Қазақстанда айдауда болып, Алматы облысы Желтораңғы елді мекенінде орналасқан Бүкілодақтық ондатр ш. ин-тының Қазақ аймақтық лабораториясында бақылаушы қызметін атқарды. Осы кезде Штегман құстармен қатар, ондатрдың да тіршілігін зерттеді. Іле өзен атырауының геоморфологиясы бойынша бірнеше еңбек жазды. 1923 – 53 жылы Қазақстанға байланысты зерттеу жұмыстарын жүргізді. Ол алғаш рет Б.С. Виноградовпен бірге Батыс Алтайда, 1932 жылы Көкшетау жоталарында, 1941 – 45 жылы Іле өз, атырауында, 1950 – 53 жылы Тауқұмда (Анарсай, Айдарлы, Бурылбайтал) экспедицияларда болды. 1947 – 53 жылы Іле Алатауының биік тауларындағы құстардың, Шу өзен бойындағы қылаң торғайдың тіршілігін зерттеді.

Дереккөздер

• «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VIII том
• Орнитологи Казахстана и Средней Азии: XX век, А., 2003
• Птицы Кокчетавских боров, Тр. Казах. Базы АН СССР, 1934, вып. 1, с. 5 – 34; В тростниках Прибалхашья (жизнь и приключения ссыльного натуралиста 1941 – 1946 жж.), М., 2004.