Шымкент қалалық әзіл-сықақ және сатира театры
Шымкент қалалық әзіл-сықақ және сатира театры (2018 жылға дейін "Оңтүстік Қазақстан облыстық сатира және юмор театры") – 2008 жылы 4 сәуірде құрылған жас театр.
| Шымкент қалалық әзіл-сықақ және сатира театры | |
|---|---|
| |
| Орналасуы |  ҚазақстанШымкент |
| Негізделгені | 2008 |
| Директоры | Бақдәулет Әмірқұлов |
| Көркемдік жетекшісі | Мақсат Айтжанов |
Тарихы
Театр шымылдығын С. Жүнісовтің "Қысылғаннан қыз болдық" пьесасының желісімен жазылған У. Әбдірайымовтың "Ауылым – әнім" музыкалық қойылымымен ашты. Ашылу салтанатына Асанәлі Әшімов, Әшірбек Сығай, Есмұқан Обаев және тағы да басқа өзге театрлардан келген әріптестер қатысты. Театр ұжымына "Шаншар" әзіл-қалжың театрымен танылған У. Әбдірайымов жетекшілік етті. Театр өз жұмысын "Әзілің жарасса" деген концерттік бағдарламасы бойынша бастады. Бүгінде оның репертуарында У. Әбдрайымов, Е. Қалдарбеков, К. Мәмбетакұлов, Н. Қадіров, С. Ахмад, А. Боранбаев, Д. Исабеков, Т. Ахтанов, А. Табылды, Ж. Ақшора, С. Алтаев сынды тағы да басқа авторлардың жиырмадан астам қойылымы бар.
Біраз уақытқа дейін театрдың өзінің жеке ғимараты болмағандықтан қуыршақ театрымен сахна бөлісуіне тура келді. Қазіргі уақытта оған бұрынғы "Шымкент" кинотеатрының ғимараты берілді. Театр әртістері басқа да облыстар мен аудандық елді мекендерде, сондай-ақ Алматы, Ақтау, Маңғыстау, Атырау, Қызылорда, Талдықорған тәрізді қалаларда гастрольдік сапарлармен болып қайтты.[1]
Театр жетістіктері
Театр түрлі фестивальдерге қатысып, жоғары жүлделі орындарды иеленіп келеді.
- 2011 жылы өткен "Театр көктемі – 2011" фестивалінде "Бонапарттың тойы" спектаклін қойып "көрермендер көзайымы" сыйлығына ие болды.
- 2012-2013 жылдары Шымкенттегі "Әлем әзілі" атты халықаралық І, ІІ-ші фестивалінде театр үздік нәтиже көрсетті. Бұл байқауда Ресей, Қытай, Жапония, Армения, Беларусь, Қырғызстан, Өзбекстан, Қарақалпақстан сынды елдердің белді сатириктері бас қосты.
- Қазақ хандығының 550, Ұлы жеңістің 70 жылдығына арналған "Театр көктемі - 2015" облыстық фестивалінде "Ең үздік қойылым" номинациясы бойынш жүлделі орынды иеленді.
- ҚР Тәуелсіздігінің 25 жылдығына арналған "Театр көктемі – 2016" облыстық театр фестивалінде Р. Отарбаевтың "Қараша қаздар қайтқанда" тарихи драмасымен қатысып "Актерлік ансамбльдік тұтастық" номинациясын жеңіп алды.
- ҚР Тәуелсіздігінің 25 жылдығына орай Т. Ахтанов атындағы Ақтөбе облыстық драма театрында өткен "Айтқыштар Ақтөбеде" атты республикалық VІІ әзіл-сықақ байқауында театр артистері І орынды иеленді.
- 2017 жылы Түркістан қаласында өткен Түркі әлемінің "Күлкі жәрмеңкесі" халықаралық фестивалінде театр "Жоғары деңгейде өнер көрсеткені үшін" грамотасымен және қаржылай сертификатпен марапатталды.
- Қазақтың тұңғыш режиссері Ж. Шаниннің 125 жылдығына арналған Түркі әлемі театрларының "Театр көктемі-2017" халықаралық фестивалінде К. Гольдонидің "Екі мырзаға бір қызметші" комедиясымен қатысып, ІІІ-орынды иеленіп, қаржылай сертификатпен марапатталды.
- 2017 жылы Астана қаласында өткен "ЭКСПО-2017" дүниежүзілік көрмесі аясында "Оңтүстік әзілдері" атты концерт ұйымдастырды.
- 2018 жылы Х. Шаженовтың 110 жылдығына және ҚР Халық артисі, ҚР Мемлекеттік сыйлығының иегері Р. Сейтметовтың 80 жылдығына арналған "Театр көктемі-2018" облыстық театр фестиваліне М. Әуезовтің "Айман-Шолпан" комедиясын ұсынып І орынды иеленді.
Шығармашылық ұжым
У. Әбдрайымов ("Ерен еңбегі үшін" медалінің иегері), Ж. Ақшора (ҚР Мәдениет қайраткері), О. Қалыбекова, С. Алтаев, Ғ. Қалыбаев, Ұ. Базарбаева, Н. Байысбек, Н. Зеренбаев, С. Биғабылов сынды тәжірибелі әртістермен қатар, көптеген жас таланттар да жұмыс істейді.
Бүгінгі таңда театр директоры - Бақдәулет Әмірқұлов, театрдың көркемдік жетекшісі – Мақсат Айтжанов.
Дереккөздер
- ↑ Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9