Шығыс Понтий таулары

Шығыс Понтий таулары – Түркияның солтүстігіндегі тау-жоталар жүйесі, Понтий тауларының шығыс бөлігі. Қара теңіз жағасына параллель, батысында Мелет, шығысында Чорух өзендері аралығында созыла орналасқан. Гиресун, Гюмюшане, Зигана, Трабзон және Лазистан (Качкар тауы, 3937 м) жоталарын біріктіреді. Ұзындығы 400 км, ені 100 км. Кристалдық, метаморфтық және жанартаулық жыныстардан түзілген. Өзендермен күшті тілімделген. Солтүстік беткейінде (жылдық жауын-шашын мөлшері 3000 мм-ге дейін) ылғалды субтропиктік, 400 – 500 м-ден жоғары аралас және шырша ормандары өседі. Оңтүстік қуаң беткейлерінде жерортатеңіздік “құрғақ” орман және бұталар өседі. 2000 м-ден жоғары субальпі және альпі шалғыны тараған.

Сілтемелер

"Қазақ Энциклопедиясы", 9 том