Ымырт (романдар сериясы)

«Ымырт» — жазушы Стефани Майердің «Ымырт» деп аталатын сериялы романдарының бірінші кітабы. Мұнда 17 жасар қарапайым Изабелла Свон есімді жас қыз бен Эдвард Каллен есімді қансорғыш (вампир) жігіттің махаббаты баяндалады. Кітап 2005 жылы басылып, оқырмандарына жол тартты. Өзінің қызықты, əрі алуан түрлі шытырман оқиғаларға толы сюжетімен миллиондаған адамның жүрегін жаулап алады.Фантастика жанрында жазылған романның алғашқы басылымы АҚШтың өзінде 100 000 таралыммен тарап, рекордтық нәтижеге қол жеткізді. «Ымырт» – New York Times газетінің бестселлерлер тізіміне енген.

Сюжеті

Анасының жаңа, бейсболист күйеуімен еркін ойнап-күліп, саяхаттауы үшін Белла Свон нұрлы Финикстен жауын-шашынды, ылғалды Вашингтонның Форкс аймағында тұратын әкесі Чарлидің үйіне көшіп келеді. Жаңа мектепке барған алғашқы күннің өзінде-ақ Белла түсініксіздеу дегенмен өте жарасымды Элис пен Джаспер, Розали мен Эмметт және Эдвард Каллен есімді отбасы мүшелерін көреді. Сонда оқитын студенттер олардың дәрігер Карлайл Каллен мен әйелі Эсмидің асырап алған балалары екенін айтады. Айтуларынша, ерлі-зайыптылар өте жас көрінеді, ал Эсми бала көтеруге қабілетсіз болса керек. Белланы осы отбасының жайы, әсіресе, келбетті Эдвард қатты қызықтырады. Биология пәнінің алғашқы сабағында мұғалім оны Эдвардпен бірге отырғызады. Белла жігіттің өзіне әлдебір жеккөрушілікпен қадала қарап отырғанын байқап, оның себебін түсінбей дал болады. Көп күттіріп қоңырау да әрең соғылғанда Эдвард сыныптан атып шыға жөнеледі де бірнеше күн бойы мектепке келмейді. Араға біршама уақыт салып сабаққа оралған жігіт Белламен танысып, сөйлесе бастайды. Келесі күні күтпеген жерден кездойсоқ оқиға болады. Зымырап ұшып келе жатқан машинаның фургонын қолымен итеріп тоқтатқан жігіт осылайша қыздың өмірін сақтап қалады. Жігіттен мұндай жойқын күшті күтпеген Белланың көңіліне күдік ұялап, мұның мәнісін сұрай бастағанда, ол қызға солайша елестегенін айтып, бірден ашыла қоймайды, есесіне бірнеше ай бойы сөйлесуді доғарады. Бірақ мектептегі жолдасы Майк Ньютон Белланы көктемгі биге шақырғанына куә болып, Эдвард қызға қайта оралады, бірақ олардың достасуларының қыз үшін қауіпті екендігін айтып сақтандырмақ болады. Кейін Белла мектептегі достарымен бірге үндістер резервациясындағы Ла-Пуш жағажайына барады, онда бала күнгі досы Джейкоб Блэкті кездестіреді. Джейкоб оған өз тайпасының қансорғыштар туралы ескі аңызының бірін әңгімелеп береді және Каллендер отбасының қансорғыштар табынан екенін айтады.

Сілтемелер

• Стефани Майер ресми сайты (ағыл.)
• «Ымырт» романдар сериясының ресми сайты (ағыл.)
• Ымырт сагасындағы beauty-эволюция (қаз.)