Экономикалық жағдаят

Экономикалық жағдаят – экономикада қалыптасқан жағдайды, шаруаның жай-жапсарын сипаттайтын өзара байланысты шарттардың жиынтығы; нарықта әрбір сәтте қалыптасқан экономикалық ахуал.

Ол тауарға (өнімге‚ бұйымға‚ қызметтерге‚ басқа да құндылықтарға) сұраным мен ұсынымның белгілі бір ара қатынасымен‚ бағаның деңгейімен‚ инвестициялық‚ кәсіпкерлік белсенділікпен‚ бағалы қағаздар бағамымен‚ депозит пен несие бойынша пайыздық мөлшерлермен‚ тауардың босалқы қорларының болуымен‚ басқа да көрсеткіштермен сипатталады. Сонымен бірге ол тек экономикалық факторлардың ғана емес‚ саяси‚ әлеуметтік‚ техникалық‚ экологиялық‚ т.б. факторлардың ықпалын да көрсетеді. Экономикалық жағдаят жалпы экономикалық жағдаят және жекелеген нарықтардың жағдаяты болып бөлінеді. Негізгі көрсеткіштері – өнім шығару көлемінің, тауар айналымы мен айналысының, бағаның, кірістің, пайыздың, валюта бағамының, т.б. серпіні. Экономикалық жағдаят несие-ақша қатынастарына орай капиталдың айналымы мен ауыспалы айналымының, ақша айналысының, несие қатынастарының, капиталдар нарығындағы сұраныс пен ұсыныстың қалыптасқан жай-күйімен сипатталады. Оның көрсеткіштері – баға, инфляция деңгейінің серпіні, қаржы нарығындағы операциялардың көлемі, несие пайызының мөлшері, бюджет тапшылығының жай-жапсары, банкілердің өтемпаздығы, т.б. Нарық жағдаяты – шаруашылық жүргізуші субъектінің, активтердің, тауарлардың және көрсетілетін қызметтердің нақты нарығындағы экон. ахуалды стратегия әзірлеу үшін маркетингілік зерттеулер шеңберінде зерделеу.