Электр станциясы

Электр станциясы — электр энергиясын өндіруге арналған құрал-жабдықтар мен қондырғылардың, сондай-ақ осы мақсат үшін салынған құрылыстар мен ғимараттардың жиынтығы.

Павлодардағы электр станциясы

Ол энергия көзіне сәйкес су электр станциясы, жылу электр станциясы, атом электр станциясы, жел электр станциясы, гелиоэнергетикалық станция және магнитогидродинамикалық генератор болып ажыратылады. Жылу электр станциясына конденсациялық электр станциясы, жылу электр станциясы, газ турбиналы электр станциясы, дизель электр станциясы жатады. Республика бойынша өндірілетін электр энергиясының 80%-ға жуығы жылу электр станцияларының үлесіне тиеді. Болашақта қуаты зор атом электр станциялары үлкен рөл атқаратын болады. Магниттік гидродинамикалық генераторда магнит өрісінде қозғалатын электр өткізгіш ортаның (сұйық не газ) энергиясы электр энергиясына тікелей түрленеді.

Алғашқы электр станциясы 1882 ж. Нью-Йоркте салынған. Бұл станцияға тұрақты токтың 6 динамомашинасы орнатылып, олардың әрқайсысы қуаты 125 ат күшіне тең бу машинасымен қозғалысқа келтірілді. Қуатты электр станциясын салу, өндірілген энергияны алыс жерге жеткізу мәселесі тек үш фазалы ток жүйесінің ашылуына байланысты шешілді.

1913 ж. Қазақстанда өндірілген жалпы энергия мөлшерімен 3000 кВт-қа ғана жетті. Қазақстандағы ең алғашқы бу турбиналы электр станциясы (қуаты 1240 кВт) 1926 ж. Қарсақбай комбинатында, ал алғашқы СЭС – Жоғары Хариузовск СЭС-і (қуаты 3000 кВт) 1928 ж. салынды. 1935 ж. Алматыда бу турбиналы электр станциясы іске қосылды.