Ғазизбек Тәшімбай

Ғазизбек Тәшімбай (10.4.1938 жылы туған, Талас ауданы, Майтөбе ауылы) – журналист, жазушы. ҚазМУ-ді бітірген (1964). 1957 – 1959 ж. Жамбыл ауданы «Ленин жолы» газетінде жауапты хатшы, облыстық «Еңбек туы» газетінде корректор болды. 1964 – 1990 жылдары республикалық «Спорт» газетінде әдеби қызметкер, «Қазақстан» баспасында редактор, аға редактор, редакция меңгерушісі, бас редактордың орынбасары болды. 1990 ж. Қазақ телеграф агенттігінде редакция меңгерушісі, Қазақстан Республикасы Президентінің аппаратында консультант, Үкімет аппаратында сектор меңгерушісі болып қызмет атқарды. 1996 – 2001 ж. Қазақстан Республикасының Ұлттық банкінде аударма бөлімін басқарды. Тәшімбай Қазақстан Журналистер одағының мүшесі, бірнеше кітаптардың авторы. Майталман спортшылар жайында жазылған «Топжарғандар» жинағын, Қажымұқан Мұңайтпасұлы туралы «Күш атасы» атты екі естеліктер жинағын, «Құм арасында», «Қос терек», «Қызғалдақ қалың шыққан жыл» атты әңгімелер жинақтарын, Қазақ баспасөзінің ардагері Мұқан Мамажановтың мұрасын зерттеп, «Еңбек еттім, ел үшін» деген ғұмырнамалық-шығармашылық жинақ шығарды (1999). «Молодая гвардия» баспасы «Тамаша адамдардың өмірі» циклынан шығарған «Сальвадор Альенде», «Че Гевара» кітаптарын, Кеңес Одағының Батыры Г.Сафиуллиннің «Жеңіс жолында» кітабын қазақ тіліне аударды. Қазақ КСР Жоғ. Кеңесінің Құрмет грамотасымен марапатталған.