Қабыкей Ахмерұлы

Қабыкей Ахмерұлы (27 шілде 1927 жылы туған, Моңғолия, Баян-Өлгей аймағы, Бұлғын өлкесі) - композитор, музыка зерттеушісі, Моңғолияның еңбек сіңірген артисі (1976).

Сол өңірдегі күйші сыбызғышылардан (Ахмер, А.Қызыл, А.Жұқа, Н.Қытайбай, М.Ыбырай) халық ән-күйлерін үйренген.

Өнер жолын мәдениет клубынан бастаған. 1958 - 59 жылдары Алматыда ұлт-аспаптар оркестрінде шеберлігін шыңдаған соң, Баян-Өлгей қазақ музыка драма театрында 30 жыл бойы ұлт-аспаптар оркестріне жетекшілік етті.

Әр ел композиторларының 200-ге тарта шығармасын оркестрге түсірген.

Қабыкей 25 ән, ондаған би музыкасы және 30-ға тарта күй авторы (1965). "Моңғолия қазақтарының халық әндері" (1965), "Ән кітабы" (1972), "Баян-Өлгий қазақтарының домбыра және сыбызғы күйлері" (1977), "Моңғолия қазақтарының халық әндері" (1983) жинақтарын дайындап, бастырды.

Соңғы жинағына қазақ халқының 250-дей әнін түрлі нұсқаларымен, мәтіні мен және нотасымен жариялаған.

Моңғолияның "Алтын жұлдыз" орденімен (1960) марапатталған.

1992 жылы Қазақстанға қоныс аударған.