Қажымұқан тасы

Қажымұқан тасы - көлеміне құлаш жетпейтін үлкен тас. Бұл тасты кез келген адам көтере алмайды, салмағы да тым ауыр. 1920 жылдың жазында Баянауыл тұрғыны Қуанышбайдың Сүбегі деген ұстаның үйіне түскен атақты палуан Қажымұқан Мұңайтпасұлы алғашқы автономиялық республика тойы өткен соң қайтарда шаңырақ иесіне: «Менен не қалайсың?» - дейді. Сүбек анадай төбе үстінде дөңкиіп жатқан алып тасты көрсетіп, «дүкенім жанына әкеліп тастаңыз, үрім-бұтағыма «Қажымұқан әкеліп қойған тас» деп айтып жүрейін, бар қалауым осы» — депті. Сүбектің «қалауын» орындаған соң Қажымұқан, онымен құшақтасып, қош айтысып жүріп кетеді. Сол кезден ол ел аузында «Қажымұқан тасы» аталып кеткен. Қажымұқан тасы бүгінде бабадан қалған қасиетті белгідей орталық алаңда шынжырлап жасалған әсем қоршау ішінде тұр. Баянауыл өңіріне келушілер оған соқпай өтпейді. Палуан Баянауылға Қазақ автономиясының бір жылдық тойына арнайы шақырумен келген. Шақырушы – Қаныш Сәтбаев.